Subscricións

Subscribete ás actualizacións da nosa axenda para estar sempre informado dos eventos  que acontecen na nosa casa. A subscrición está dispoñible en calquera dos seguintes formatos:

O equipo do proxecto europeo "EMPATTICS", liderado pola ACIS, reuniuse na Casa de Galicia para avanzar nos seus traballos

Conta coa participación de oito entidades de cinco países europeos
Madrid, 17 de abril de 2017.

O equipo do proxecto europeo EMPATTICS (Empowering Patients for the Better Information and Improvement of the Communication Systems), liderado pola ACIS (Axencia de Coñecemento en Saúde, do Servizo Galego de Saúde) e que conta coa participación de oito entidades de cinco países europeos, mantivo hoxe unha reunión nas instalacións da Delegación da Xunta de Galicia en Madrid/Casa de Galicia para avanzar nos seus traballos. Foi recibido polo delegado da Xunta e director da Casa, José Ramón Ónega, que lle deu a benvida e deséxolle sorte nos seus labores.

O encontro tiña por obxecto terminar de introducir as recomendacións dadas na reunión de revisión celebrada en Bruxelas o 23 de febreiro por expertos externos encargados de avaliar o progreso do proxecto e de analizar o prego de condicións e a súa documentación relacionada co procedemento de licitación que se lanzará o próximo mes. Este procedemento de licitación está destinado á adquisición, por parte dos servizos de saúde participantes no proxecto, de tecnoloxías que faciliten a xestión e o autocuidado dos pacientes e incrementen a adherencia aos seus tratamentos.

En concreto, o proxecto EMPATTICS, iniciado oficialmente en febreiro de 2016, constitúe unha iniciativa enmarcada no programa de innovación Horizon 2020 da Unión Europea que ten como finalidade a identificación e posterior adquisición, a través dun procedemento de compra pública precomercial, de ferramentas que poidan ser utilizadas nos sistemas públicos de saúde para axudar aos enfermos crónicos a desenvolver actitudes máis saudables, mellorando ao mesmo tempo a comunicación entre os enfermos e os profesionais sanitarios.

Na reunión ademais da delegación galega, integrada por dous representantes de Galicia, participaron tamén delegados dos servizos de saúde doutras das dúas rexións que actúan como socias compradoras no consorcio: Aragón e Rexión de Dinamarca Central.

 

Departamento: Prensa

Compárteo:

Facebook Twitter

Imaxes