Medios

Subscricións

Subscribete ás actualizacións da nosa axenda para estar sempre informado dos eventos  que acontecen na nosa casa. A subscrición está dispoñible en calquera dos seguintes formatos:

Santín, Palomares, Reigosa e Ónega debaten na Casa de Galicia sobre as patoloxías dos políticos

Con ocasión da publicación dun libro de Enrique Santín que aborda este tema
13 de novembro de 2013

 "A patoloxía dos políticos" é o título dun libro recente do escritor e empresario Enrique Santín e o da mesa redonda que con motivo da publicación dese libro se celebrou hoxe na Casa de Galicia en Madrid. Nela participaron, ademais do autor do libro, os escritores e xornalistas Alfonso S. Palomares e Carlos G. Reigosa e o delegado da Xunta de Galicia en Madrid, José Ramón Ónega, que moderou o encontro, ante numeroso e relevante público, entre o que se achaban o presidente do Consello de Estado, José Manuel Romay Beccaría, e o ex ministro Rodolfo Martín Villa.

Madrid, 13 de novembro de 2013. - "A patoloxía dos políticos" é o título dun libro recente do escritor e empresario Enrique Santín e o da mesa redonda que con motivo da publicación dese libro se celebrou hoxe na Casa de Galicia en Madrid. Nela participaron, ademais do autor do libro, os escritores e xornalistas Alfonso S. Palomares e Carlos G. Reigosa e o delegado da Xunta de Galicia en Madrid, José Ramón Ónega, que moderou o encontro, ante numeroso e relevante público, entre o que se achaban o presidente do Consello de Estado, José Manuel Romay Beccaría, e o ex ministro Rodolfo Martín Villa.

Ónega valorou que o libro de Santín debería estar nas mesas de noite de todos os políticos e dos que aspiran a selo e ser de obrigada lectura en universidades e en partidos políticos. "Santín fai gala dunha pluma áxil, reflexiva e elegante de profesor afeito aos clásicos e á autoridade, tanto de estilo coma de funcionamento", manifestou, engadindo que a obra resume o que é a política e o que deberían ser os políticos.

Palomares dixo ter sacado do libro o convencemento de que o que o autor "quere formular para o futuro é que a vida sexa libre para cada un e xusta para todos e que este é o fin que deben perseguir todos os políticos". "É un libro froito da vida. Este libro non se escribe de adolescente", sostivo. Tamén defendeu que unha sociedade non é democrática se non conta cunha prensa libre.

"Se don Alfredo Pérez Rubalcaba tivese lido este libro, non tería optado por ´ remitir ao transcurso do tempo a solución dos problemas ´ porque isto é caer nun fatalismo ou nun voluntarismo falso e perigoso", apreciou Reigosa, quen resaltou que no libro se manifestan 106 formas de patoloxías e o comportamento que as emenda. Afirmou que o libro é oportuno e completo, contén "toneladas de sentido común e de agudeza intelectual" e está escrito cun estilo directo e divertido. Por outra parte, admirouse de que as súas notas coincidisen coas de Ónega en considerar que debería ser de lectura obrigatoria para os políticos.

Santín agradeceu a presenza dos participantes na mesa e dos asistentes ao acto e referiuse á Casa de Galicia como "fogar e foro de cultura de Galicia en Madrid" e "nave insignia e capitá da galleguidad".

Respecto ao libro, recoñeceu a Palomares que non é froito dun día senón da súa longa traxectoria vital, a pesar do cal, sinalou, "foi feito dun tirón, ás beiras do Texo, nunha semana en Lisboa na que facía mal tempo" e se vió obrigado a recluírse no hotel.

Aproveitando a presenza dos dous prestixiosos xornalistas que o acompañaron na mesa, Santín subliñou "a excelencia do periodismo auténtico que eles representan e cuxos piares fundamentais son: autonomía de pensamento; independencia de criterio e espírito crítico". "Pero eses tres piares da información e o periodismo só son posibles nunha sociedade plural, aberta e democrática. A crítica xornalística é tan esencial á democracia como a censura o é á ditadura", advertiu.

Cun apaixonado discurso, Santín defendeu que "os medios de comunicación social, en todas as súas modalidades, sempre que sexan e se exerzan con liberdade e responsabilidade, constitúen o maior bastión fronte aos abusos do poder"; que "de non ser pola liberdade da información, moitos dos males da nosa sociedade e moitos dos abusos e erros dos nosos políticos quedarían ocultos ou, o que é peor, impunes" e que "a liberdade política da persoa e o recoñecemento da súa dignidade como cidadán, necesitan, en suma, da división de poderes, a liberdade de prensa e a acción popular ou cidadá".

 

 

Departamento: Prensa

Compárteo:

Facebook Twitter

Imaxes