Subscricións

Subscribete ás actualizacións da nosa axenda para estar sempre informado dos eventos  que acontecen na nosa casa. A subscrición está dispoñible en calquera dos seguintes formatos:

Investigadores de cinco países reúnense na Casa de Galicia para avanzar no proxecto Cockler, que opta ao programa Interreg Espazo Atlántico de la UE

Entidades de Reino Unido, Francia, Portugal e España traballan conxuntamente coordinadas polo CETMAR de Vigo
Madrid, 28 de novembro de 2016.

Investigadores de Reino Unido, Francia, Portugal, Irlanda e España que traballan conxuntamente nun proxecto coordinado polo Centro Tecnolóxico do Mar (CETMAR), situado en Vigo, reuníronse hoxe na Delegación da Xunta de Galicia en Madrid/Casa de Galicia para avanzar nos traballos cos que optan a integrar o seu proxecto, Cockles, no Programa Interreg Espazo Atlántico 2014-2020, da Unión Europea (UE).

O delegado da Xunta de Galicia en Madrid e director da Casa de Galicia, José Ramón Ónega, dirixiuse a eles para darlles a benvida ás instalacións da Delegación e desexarlles un exitoso traballo.

Varias institucións dos citados países traballan conxuntamente no proxecto Cockles para potenciar a produción do berberecho de forma sustentable, valorando o servizo que dá ao ecosistema a través da cadea alimentaria de varias especies de aves e peces. Por España participan no proxecto a Universidade de Santiago de Compostela, representada por Paulino Martínez, catedrático de Xenética, a Consellería do Mar da Xunta de Galicia, representada polo investigador do seu Centro de Investigacións Mariñas Antonio Villalba, e o Centro Tecnolóxico do Mar (CETMAR), que estivo representado pola súa coordinadora de Transferencia de Tecnoloxía e coordinadora do proxecto, Rosa Fernández.

No consorcio que prepara o proxecto tamén hai representantes das universidades de Aveiro e Lisboa e do Instituto Portugués do Mar e da Atmosfera (Portugal), as universidades de Bordeus e Caen e o Grupo de Estudo de Fondos de Estuarios e Litorais (Francia), a Universidade de Bangor e o Centro de Ecoloxía e Hidrología e Recursos Naturais de Gales (Reino Unido), e a Universidade de Cork (Irlanda).

No programa da UE Interreg Espazo Atlántico só poden participar comunidades autónomas con litoral atlántico. A convocatoria europea péchase o próximo 12 de decembro e este proxecto xa superou a primeira etapa de selección de propostas e áchase entre os cen nos que quedaron para o proceso definitivo, dos catrocentos que o solicitaron inicialmente.

 

 

Departamento: Prensa

Compárteo:

Facebook Twitter

Imaxes