Subscricións

Subscribete ás actualizacións da nosa axenda para estar sempre informado dos eventos  que acontecen na nosa casa. A subscrición está dispoñible en calquera dos seguintes formatos:

Actualidade

Mostrando o intervalo 701 - 710 de 846 resultados.

A Casa de Galicia en Madrid acolle o resultado das últimas investigacións pictóricas da artista pontevedresa Chuneta

O resultado das últimas investigacións pictóricas da artista pontevedresa Chuneta -Mercedes Sánchez-Agustino Pita- exhíbese dende hoxe e ata o próximo día 29 en dúas das salas de exposicións da Casa de Galicia-Delegación da Xunta de Galicia en Madrid, nunha mostra que leva o nome da pintora e que recolle os seus últimos traballos en pintura, relacionados coa animación, así como pezas de pintura-escultura nas que a primeira se acha despoxada do soporte.

Escultopinturas de "Zeta" na Casa ata o 29 de xuño

Inauguración da mostra de pintura e escultura de Abelardo Manuel Rodríguez López "Zeta", artista expresivo, xestual e enérxico, cuxas creacións son auténticas "escultopinturas". No acto interviñeron o coordinador de Actividades da Casa, Ramón Jiménez Pérez, a pintora Ana Ferreiro Álvarez e o propio autor, Abelardo Manuel Rodríguez López, coñecido dende a súa infancia como "Zeta" e nome que tamén adoptou no mundo artístico.

"Eu asusteime algo cando vin en directo onte estes grandes cadros con eses pedrolos incrustados ameazando caer e esmagarche un pé, ata que descubrín por pura casualidade que non eran tales pedras senón unha simulación de pedras pintadas, realizadas cun enorme esmero a base de poliespán", desvelou na presentación o coordinador da Casa.

A delegación da Xunta en Madrid colabora coa universidade de Santiago no proxecto Galicia Mundi

A delegación da Xunta en Madrid colaborou activamente esta semana no traballo de campo que os profesores da Universidade de Santiago, Vicente Peña Saavedra e Antonio Rodríguez Martínez están a realizar dende fai dous cursos para analizar o asociacionismo dos galegos no exterior. O delegado da Xunta en Madrid e director da Casa, José Ramón Ónega López, xunto cos coordinadores de Actividades da Casa, Ana Rodríguez Barrena e Ramón Jiménez Pérez mantiveron unha densa reunión cos investigadores para informar e achegar datos das diferentes asociacións profesionais, culturais e centros galegos da Comunidade de Madrid coas que a Casa mantén estreitas relacións. Ónega, tras facer unha breve exposición sobre as funcións da Casa, entre as que están, ademais da institucional, "a de servir de altofalante en Madrid, de todo o galego, tanto cultural e económico empresarial, así como elemento aglutinador dos diferentes colectivos". Para Peña, director do proxecto, "é unha axuda inestimable, a que encontramos aquí, que nos facilitou enormemente a recollida de datos para o estudo que estamos a levar a cabo. Grazas a iso, puidemos concentrar o traballo que desenvolvemos en dúas xornadas, moi intensas pero enormemente frutíferas, algo para o que que noutras circunstancias tivésemos necesitado máis do dobre".

Presentado na Casa de Galicia o proxecto cinematográfico "9 Olas", que se rodará en Ourense e Pontevedra

A Casa de Galicia-Delegación da Xunta de Galicia en Madrid acolleu hoxe a presentación de proxecto cinematográfico "9 Olas" no que o innovador espazo cultural, de comunicación e encontros elcercano.com, que dirixe Moncho Conde-Corbal, e o director e guionista da película Simone Saibene, italiano afincado en Ourense dende hai anos, uníronse para rodar a película nas cidades galegas de Ourense e Pontevedra durante o próximo verán, cun novidoso sistema de financiamento que permite a quen o desexe converterse en coprodutor.

A relación da Constitución de 1812 coa pedagoxía pecha o simposio que Grugalma lle dedicou no seu bicentenario

 A relación da Constitución de 1812 coa pedagoxía foi a temática que centrou hoxe o "Simposio en torno ao Bicentenario da Constitución de 1812, con especial atención á presenza galaica" que se celebrou na Casa de Galicia-Delegación da Xunta de Galicia en Madrid nestes dous últimos días, protagonizando as XXVIII Xornadas de Cultura Galega organizadas polo Grupo Cultural Galicia en Madrid (Grugalma), que preside o profesor Manuel Mourelle de Lema.

A Casa de Galicia acolle as XXVIII Xornadas de Cultura Galega de Grugalma

O Grupo Cultural Galicia en Madrid (Grugalma), que dirixe o profesor Manuel Mourelle de Lema, iniciou hoxe na Casa de Galicia-Delegación da Xunta de Galicia en Madrid as súas XXVIII Xornadas de Cultura Galega cun "Simposio en torno ao Bicentenario da Constitución de 1812, con especial atención á presenza galaica", que terá continuidade mañá, tamén a partir das 19 horas. Tomando sempre como referencia a Constitución de 1812, esta primeira xornada centrouse en "A súa época e presenza paragalega" e nela interviñeron a avogada dos colexios de Madrid e Valencia María Bernal Sanz, co relatorio "A España de 1812", e o presidente de Grugalma e académico da Real Academia da Historia Manuel Mourelle de Lema, co relatorio "Personaxes ´galaicos´ , na súa relación coa tramitación e promulgación da Constitución de Cádiz".

"Luces do Atlántico", piano e gaita para celebrar o "Día das Letras"

No repertorio non faltaron nin a Negra Sombra, María Soliña ou A Maruxa, xunto con baladas e danzas interpretadas por Luis Celada Álvarez ao piano cuxo son se fundiu co que xurdía, -segundo as pezas-, da gaita, a frauta de pico, os whistles e a ocarina de Javier Celada Quintanilla.

"Nunca escoitara esta combinación de instrumentos pero encantoume", dixo unha moza espectadora que felicitou a iniciativa, "eu anímovos a que fagades máis apostas deste tipo". En cambio, de entrada, non todo o mundo estaba predisposto, como lle aconteceu a un pontevedrés de mediana idade: son dos que se deixa caer pola Casa sempre que pode, e teño que recoñecer que ao principio tiña as miñas reservas. Gaita e piano... mmm... non é habitual, pero estou gratamente sorprendido polo resultado". Estas eran algunhas opinións escoitadas tras o concerto, que contou coa asistencia de preto de dous centenares de persoas.
O acto presidiuno o delegado da Xunta en Madrid e director da Casa, José Ramón Ónega López, e nel interveu tamén o coordinador de Actividades, Ramón Jiménez.

Romay Beccaría, Camba y Ónega avalan a presentación dunha biografía do ex presidente venezolano Luis Herrera Campíng

O presidente do Consello de Estado, José Manuel Romay Beccaría, o secretario xeral de Emigración da Xunta de Galicia, Santiago Camba Bouzas, e o delegado da Xunta de Galicia en Madrid, José Ramón Ónega, acompañaron hoxe ao político, profesor, escritor, descendente de galegos e secretario executivo da Mesa da Unidade Democrática de Venezuela Ramón Guillermo Aveledo na presentación do seu libro "El llanero solidario. Verdades ignoradas sobre Luis Herrera Campíng y su tiempo", dedicado á vida e obra de quen foi presidente de Venezuela. O acto, presidido por Romay Beccaría, celebrouse na Casa de Galicia-Delegación da Xunta de Galicia en Madrid e encheu de público a instalación, a pesar da celebración deportiva que tiña lugar a poucos metros da Casa, en Neptuno. Entre os asistentes estaban un fillo do presidente biografiado, Luis Fernando Herrera Urdaneta, os senadores Iñaki Anasagasti (PNV) e Dionisio García Carnero (PP), o avogado internacionalista González Dellán, que acompañou ao autor do libro, e directivos das principais organizacións galegas en Madrid.

A figuración fotográfica e a plasticidade da pintura únense nas obras que Iago Eireos expón na Casa de Galicia en Madrid

A obra plástica do artista lucense Iago Eireos móstrase dende hoxe e ata o próximo 1 de xuño na Casa de Galicia-Delegación da Xunta de Galicia en Madrid na exposición de fotografía/pintura "Umbra Bruna", que reúne pezas nas que a figuración e a narración do medio fotográfico está en comuñón coa plasticidade da pintura, chegando a unha fusión entre o haluro de prata e o pigmento. "A imaxe latente xustapoñer se sobre o soporte pictórico, xerando á primeira vista unha abstracción que contén múltiples realidades", explica o artista.

A Casa acolle ata o primeiro de xuño a mostra "Camiños en Feminino, arte 2011-2012" na inteveñen unha vintena de artistas mulleres

O delegado da Xunta de Galicia en Madrid e director da Casa, José Ramón Ónega López presidiu a inauguración da mostra colectiva de pintura "Camiños en feminino, Arte 2011-2012", un proxecto cultural da Fundación Camiño de Santiago e a Asociación de Amigas e Amigos do Camiño Portugués a Santiago. O acto contou tamén coas intervencións do coordinador de actividades da Casa, Ramón Jiménez; o presidente da Fundación e comisario da mostra, Constantino Lores; a artista Puri del Palacio, e a critíca de arte Mª Jesús Abeledo. A exposición está formada por obras de: Amelia Palacios, Anxos Igrexas, Basilisa Fiestras, Beatriz Suárez Sáa, Carmen Cabaneiro, Carmen Hermo, Carolina M. Araújo, Chuneta, Coco Pimentel, Glau Fonseca, Helga Mader, Kuqui Pazos, Lidia Costa, Mª Ángeles Guillán, Montse Frieiro, Paula Cabaleiro, Paula Mariño, Paz Vicente, Puri del Palacio e Silvia Capelo.

Mostrando o intervalo 701 - 710 de 846 resultados.