DescargaMedios

  • (2848x4288px., 1014 Kb.)
  • (2848x4288px., 927 Kb.)
  • (2848x4288px., 1035 Kb.)

Subscricións

Subscribete ás actualizacións da nosa axenda para estar sempre informado dos eventos  que acontecen na nosa casa. A subscrición está dispoñible en calquera dos seguintes formatos:

As vías romanas do Camiño de Santiago, obxeto dunha conferencia na Casa de Galicia en Madrid

O enxeñeiro técnico Isaac Moreno analizou as característica da infraestrutura viaria e recordou as súas funcións e historia
23 de novembro de 2011

As magníficas vías romanas do norte da península, no Camiño de Santiago, estaban preparadas tanto para o transporte rodado de grandes cargas como para o tránsito rápido de vehículos lixeiros. Por elas levouse a Roma o ouro da Gallaecia, entraron produtos doutras partes do mundo, transitou o propio Augusto e, entre outras cousas, desprazouse a peregrinación a Santiago. Hoxe foron obxecto dunha conferencia, "Enxeñaría romana nos Camiños de Santiago", impartida na Delegación da Xunta de Galicia en Madrid-Casa de Galicia polo enxeñeiro técnico de Obras Públicas Isaac Moreno Gallo.

Madrid, 23 de novembro de 2011. - As magníficas vías romanas do norte da península, no Camiño de Santiago, estaban preparadas tanto para o transporte rodado de grandes cargas como para o tránsito rápido de vehículos lixeiros. Por elas levouse a Roma o ouro da Gallaecia, entraron produtos doutras partes do mundo, transitou o propio Augusto e, entre outras cousas, desprazouse a peregrinación a Santiago. Hoxe foron obxecto dunha conferencia, "Enxeñaría romana nos Camiños de Santiago", impartida na Delegación da Xunta de Galicia en Madrid-Casa de Galicia polo enxeñeiro técnico de Obras Públicas Isaac Moreno Gallo.

A conferencia enmarcouse dentro do Seminario José Antonio Cimadevila Covelos de Estudios Xacobeos, que se está a desenvolver organizado en colaboración coa Asociación de Amigos dos Camiños de Santiago de Madrid. Moreno Galo estivo acompañado e foi presentado polo presidente da Asociación, José Antonio Ortiz.

O conferenciante explicou que no extremo occidental do imperio xurdiron tres focos augusteos que capitalizaron a importante e estratéxica produción aurífera da bisbarra: Luco, Bracara e Asturica. Todos eles tiveron comunicación terrestre con Roma, a través de Asturica, con Aquitania, a través de Pompaelo, e con Italia, a través de Caesaraugusta.

En todos os casos, estas vías romanas eran magníficas estradas planificadas, proxectadas e construídas por excelentes enxeñeiros cuxa valía quedou ben demostrada nas obras que nos legaron. "O seu trazado e afirmado demostran claramente que estaban preparadas tanto para o transporte rodado de grandes cargas como para o tránsito rápido de vehículos lixeiros", segundo expuxo o técnico, que mostrou aos asistentes as características da infraestrutura viaria romana con exemplos de seccións escavadas e coas identificacións de trazados realizadas nos últimos anos.

Por estas estradas, sinalou Moreno Gallo, levouse a Roma o ouro da Gallaecia, foron e viñeron riquezas e produtos doutras partes do mundo coñecido. "Por elas transitou, tal e como está documentado, o propio Augusto, para comandar a guerra contra os cántabros dende Segisamone (Sasamón), desprazándose para iso dende Tarraco (Tarragona) en máis dunha ocasión. E por elas, acabaron desprazándose os exércitos bárbaros mentres agonizaba a administración que conservaba tan impresionante obra de enxeñaría".

Engadiu que, "aínda que coas súas capacidades estradas cada vez máis minguadas, pola ausencia dos labores de mantemento, por elas foron e viñeron as aceifas mouras, provocando racias terribles ante a debilidade dos reinos que atomizaban o territorio e tamén se desprazaron os exércitos leoneses, casteláns e navarros para pelexar entre se, moitas veces en escenarios épicos, atravesados pola propia estrada,".

E, como non, resaltou, por elas desprazouse a peregrinación a Santiago. "Esa corrente humana que alimentou os reinos cristiáns do norte peninsular coa cultura europea, servindo de cordón umbilical entre España e Europa durante moitos séculos."

Isaac Moreno Gallo é enxeñeiro técnico de Obras Públicas do Ministerio de Fomento. Traballa tamén para diversas administracións públicas, a título de especialista en Enxeñaría Romana, participando en numerosos proxectos de identificación de vías romanas, estudos técnicos de conducións de augas romanas, investigacións sobre a técnica antiga, instrumentos topográficos antigos e outras facetas relacionadas coa enxeñaría romana.

 

Departamento: Prensa

Compárteo:

Facebook Twitter

Imaxes