A Casa de Galicia en Madrid acolleu as xornadas organizadas pola FEDERACIÓN EFAs de Galicia cos equipos directivos dos centros de Promoción Rural EFA de toda España
Os equipos directivos de Centros de Promoción Rural EFA de toda España, integrados en UNEFA, desenvolveron na Casa de Galicia en Madrid unhas xornadas sobre innovación e emprendemento organizadas pola Federación EFAS de Galicia.
Sesenta profesionais de 20 escolas familiares agrarias de toda España coñeceron os pormenores da nova lei da formación profesional e as súas repercusións na empregabilidade; a importancia da innovación social no medio rural foi abordada nunha sesión impartida por Jorge Barrero, director xeral da Fundación COTEC. Carlos Ruano, project manager de Caixabank Dualiza puxo o foco na relevancia da orientación na FP Dual e Mónica Moso, responsable do centro de coñecemento e innovación Caixabank Dualiza, presentou o informe “2021 Observatorio FP Caixabank Dualiza”. O programa completouse con formacións sobre comunicación e habilidades emocionais e innovación educativa.
“O actual paradigma socioeconómico avócanos a tomar consciencia da necesidade de seguir apostando pola formación como pedra angular da fixación de poboación e da dinamización dos nosos territorios, tal e como vimos facendo nas EFAs desde hai máis de 50 anos. A nosa experiencia na metodoloxía da alternancia aula-empresa e na orientación persoal e profesional é clave para a inserción laboral e a formación integral do noso alumnado” afirmou Gabriel Tirapu, presidente da Federación EFAs de Galicia á vez que agradeceu a acollida e disposición da Casa de Galicia en Madrid.