O director de Turismo de Galicia, Xosé Merelles, presentou onte na Casa de Galicia en Madrid xunto ao director, Javier Vázquez, a oferta de entroidos tradicionais galegos ante máis de medio cento de representantes de axencias de turismo. A intención é, como expresou, reforzar a chegada de viaxeiros nacionais fóra de temporada alta e seguir consolidando o Entroido galego “como unha das ofertas turísticas con máis potencial do inverno galego”.

Xosé Merelles recordou a aposta da Xunta de Galicia por manter e divulgar os entroidos tradicionais a través de distintas iniciativas como a posta en marcha, o primeiro domingo de setembro, dun desfile promocional no que se poden ver polas rúas de Santiago de Compostela unha importante representación dos entroidos. Convidou, ademais, a achegarse a Galicia durante as celebracións desta festividade nun momento especial para o turismo nacional, fóra de temporada alta.

Referiuse aos entroidos de Interese Turístico de Xinzo de Limia, Verín, Viana do Bolo, Cobres, Laza, Manzaneda, Xenerais da Ulla, Maceda, Vilariño de Conso, Foz e o Enterro da Sardiña de Marín. Na presentación tamén fixo referencia a outros moitos que destacan polo seu arraigo e tradición como As Bonitas de Sande, Vellaróns de Riós, O Ribeirao de Santiago de Arriba, Samede, Os Galos da Mezquita, Follateiros de Lobios, Felos e Madamas de Esgos, Madamitas e Madamitos de Entrimo ou os Mudados de Ribadetea de Ponteareas, entre outros. 

A acción promocional celebrada hoxe na Casa de Galicia en Madrid enmárcase na estratexia da Xunta de Galicia por reforzar a oferta turística e divulgala fóra de temporada alta no seu obxectivo de diversificar a oferta e desestacionalizar a demanda.