Para Jesús Vázquez Gallego (artisticamente, Xesús Vázquez) a pintura é unha afección que lle acompaña desde os seus primeiros anos no campo da medicina, como unha vía de escape á tensión diaria.

Comezou sendo ‘un coleccionista’ ata que decidiu poñerse en marcha, pincel en man, e tratar de expresarse el mesmo nos seus lenzos. Desde os seus comezos ata a actualidade apréciase unha marcada evolución na súa obra, que iniciou por paisaxes que lle serviron para familiarizarse cos pinceis; agora explora unha técnica máis abstracta, nunha constante evolución en procura de novidades e desenvolvemento artístico e persoal. As xeometrías expresionistas de Xesús Vázquez reinterpretan as formas desde unha óptica onde a cor e a textura son os protagonistas, cunha imaxinación que dispón os elementos dunha maneira construtiva e abstracta para xerar novas e intensas sensacións.

Cada vez máis artista que médico, a súa paixón pola arte asolaga con forza as súas veas creativas, traducíndose nunha serie de abstraccións cuxos vermellos e ocres cargados e intensos prefiguran unha coctelera de emocións que se esparcen libres polos lenzos.

Despois de licenciarse en Medicina na Universidade de Compostela, Xesús especialízase en Traumatoloxía e Rehabilitación en Madrid. Logo desprázase á  Coruña e de alí a Lugo (en 1974) onde obtén a praza de Xefe de Servizo de Rehabilitación do Hospital do SERGAS (nese momento INSALUD).

Cando chega a Lugo estuda pintura co pintor Pacios e mantén desde entón unha actividade pictórica máis ou menos intensa segundo as épocas, pero non é ata 2007 cando realiza a súa primeira exposición. Entón xa se penetrou no mundo expresionista/abstracto que mantén ata a actualidade.

No ano 2014 crea o grupo “Catro médicos por…..” formado por 4 compañeiros de profesión e de devoción.

• 2007-2023: 20 exposicións individuais (nacionais e internacionais), 67 exposicións colectivas (nacionais e internacionais) e 9 certames internacionais (mención de honra de prata en “7th International Exhibition Of Small Format 20x20 cm”, Figueira dá Foz-Portugal-2017).